Номер 1, страница 151 - гдз по белорусской литературе 9 класс учебник Праскаловіч, Рагойша

1. Чым вас найбольш уразіла асоба Максіма Багдановіча? У чым «загадка Багдановіча»?

1.У Мінску на доме № 25 па вуліцы Максіма Багдановіча можна ўбачыць мемарыяльную дошку з выявай профілю паэта. Надпіс сведчыць, што тут калісьці стаяла хата, у якой 9 снежня 1891 года нарадзіўся будучы класік беларускай літаратуры. А з другога боку вуліцы, непадалёку ад Нацыянальнага акадэмічнага Вялікага тэатра оперы і балета Рэспублікі Беларусь, узвышаецца велічны помнік паэту. Максім Багдановіч з васільком у руцэ задуменна глядзіць на тое месца, дзе калісьці з'явіўся на свет. Варта ж прайсці ўсяго сотню метраў, наблізіцца да Свіслачы — і перад намі прыгожы мураваны будынак Літаратурнага музея Максіма Багдановіча.

Праз год пасля нараджэння хлопчыка бацькоў — настаўнікаў Марыю Апанасаўну і Адама Ягоравіча — пераводзяць на працу ў Гродна. У 1895 годзе Максім разам з маці, братамі, Вадзімам і Львом, некалькі вясенне-летніх месяцаў гасціў у роднай сястры маці ў вёсцы Вяззе Асіповіцкага раёна. Тут ён упершыню прычасціўся да жывых крыніц роднай мовы, стаў нават гаварыць па-беларуску. Аднак не споўнілася яму і пяці гадоў, як ад сухотаў памірае маці. Ад маці Максім пераняў і творчую адоранасць (яна пісала апавяданні, выдатна іграла на фартэпіяна), і некаторыя рысы характару: мяккасць, жывасць, весялосць, уражлівасць, спагадлівасць. Але, на жаль, ад маці яму перадалася і тая спадчынная хвароба, ад якой ён будзе няспынна лячыцца і ад якой, урэшце, не зможа выратавацца...

Адама Ягоравіча пасля смерці жонкі перавялі на працу ў Ніжні Ноўгарад. Там ён пазнаёміўся, а потым і парадніўся з Максімам Горкім. Бацька Максіма Багдановіча ажаніўся з Аляксандрай Волжынай — роднай сястрой жонкі рускага пісьменніка Максіма Горкага.

У 1902 годзе Максім Багдановіч пачаў вучыцца ў мясцовай мужчынскай гімназіі. З 1908 года працягнуў вучобу ў такой жа гімназіі ў Яраслаўлі, куды на працу перавялі бацьку.

Якраз у гады вучобы ў мужчынскай гімназіі распачалося тое, што пазней назавуць «загадкай Багдановіча» (Міхась Стральцоў).

У чым крыецца разгадка гэтай «загадкі»? У той час у Вільні пачала выходзіць штотыднёвая беларускамоўная газета «Наша ніва» (1906—1915). Спецыяльна для Максіма газету выпісала ў Яраслаўль яго хросная маці Вольга Епіфанаўна Сёмава. Кожны нумар выдання ён чакаў як свята. Калі быў у апошнім класе гімназіі, асмеліўся даслаць у віленскую газету (а яна і апублікавала) адзін з першых твораў — алегарычнае апавяданне «Музыка» (1907). Пасля ў газету ён стаў дасылаць больш паэтычных і празаічных твораў.

1. Асоба Максіма Багдановіча найбольш уражвае сваёй трагічнасцю і адначасова неверагоднай сілай духу. Пражыўшы ўсяго 25 гадоў, большую частку з якіх — за межамі Беларусі, пакутуючы ад смяротнай хваробы, ён здолеў стаць адным з класікаў і наватараў беларускай літаратуры. Паражае яго самаадданая любоў да Радзімы і мовы, якую ён, па сутнасці, вывучыў па кнігах, але адчуваў як ніхто іншы.

У гэтым і заключаецца «загадка Багдановіча». Гэта загадка таго, як у такіх неспрыяльных умовах мог нарадзіцца геній еўрапейскага маштабу. Як чалавек, які амаль не жыў на роднай зямлі, змог так глыбока спасцігнуць душу свайго народа, выказаць яго спадзяванні і боль. Яго жыццё і творчасць — гэта цуд, які дагэтуль выклікае здзіўленне і захапленне.